友「你」更精彩營會 一個好精彩的退修會，有充足安靜時間，充足休息時間，充足祈禱時間。 第一天到達長洲走圍逛一逛後上營地安頓好就舉行開幕禮， 各位家員都畫下08年的自己和09年的期望， 晚上潘牧師及劉牧師的友情分享--「朋友乃時常親愛，弟兄為患難而生。」 我一生人結交無數，在我身旁都有一班當大家有咩事會替大家焦急、分憂的好兄弟， 聽到中途送小羊落山，錯過了一些部分，落山後同波波、杯麵、東東「打飯(小食)砲」， 之後返上山參與團聚，其實呢一年大陣仗經歷上帝真係有超級無限多，希望大家都能緊記！ 第二天晨禱，之後做早操，在操場跑圈感受上帝既恩典，好耐無做運動， 但個人跑極都好似唔會累咁，好似上帝既恩典多都無耗盡既時候咁， 早餐後的聚會名為「孤獨的神」，讀以賽亞書，發覺願來神真係好孤獨無朋友的， 究竟神在仰望之家有無有朋友呢，我認為是有的，因為我地都係一班回轉向神的人， 我地既生命都在活出耶穌的心志，也等於生命在活出上帝， 所以我地都是神的朋友，只是我地經常犯罪，遠離神，係自己唔同神做朋友。 之後走以馬忤斯之路，思考困擾自己的事，和最喜愛的福音故事， 原來好多人都與我一樣喜愛浪子的比喻，我立志自己要做個手潔心清人， 行在真理中，唔要好似小兒子咁，令我既父為我傷心、擔憂。 之後從牧師中學習到基督徒要隨時都預備好自己的生命去與人分享， 唔洗怕自己既分享，只要係經歷上帝，同主耶穌有關既就一定係勁野！ 晚上禁食代禱，願來禁食時越餓，是正反應自己的靈命越需要餵飽， 又要時常開闊自己的眼界，為世上不同的需要祈禱。 又學識了除了7代表完全，10是代表完整，12有永恆的意思。 還有一個好重要的信息，就係耶穌係最勁，在約翰福音中的祂是從來無輸過， 只要倚靠佢就一定會贏硬，無輸既機會！ 接著是軍聚，希望大家在新一年都能夠好好發揮自己， 一齊建立衠軍，令衠軍充滿熱情，各人都行在真理中， 為上帝做每一件事，過每一天！(家鴻：衠軍唔可以做寬頻，要做光纖) 第三天晨禱後，因天雨關係，所以沒有遊小長城，但自己行行下都經祕道行在落小長城， 並嘗試走到最接近大海的地方，結果給我找到了一個亭，出面便是大海， 整個活動最大提醒就係上帝所創造的天地萬物每一天都好努力將上帝賜比自己既發揮出黎， 我發覺其實呢個世代好多人都喜愛收埋自己，但這樣對自己，對群體，對整個世界都無好處， 我地身為呢個世界最有靈性既生物，當然就更加要做得好過d飛禽走獸， 將上帝創造自己，給自己最大既長處發揮出黎，讓自己既生命可以活出上帝既計劃。 精彩兩個字，我以前一直以為係有d野預備左好耐，然後有一個好結局就係精彩， 但原來精彩仲係要令人出奇，亦要去將一些東西捨棄，才能換取精彩， 期望自己能像牧師所講，在09年年尾回顧08年時， 能像保羅在林前一樣數算每一件事都為上帝而作，為上帝而精彩。 在立志會中的一首詩歌為主飛行，真的十分動聽+激勵， 看見仰望之家每一個弟兄姊妹都願意奉上自己的一份力量， 一同建立仰望之家，令仰望之家更精彩時，真的十分感動， 期望每個人都能將這個使命帶到生活當中，以致我們在生活中都能夠--- 與人更精彩，與神更精彩，令仰望之家更精彩！ | 